Rokkarnir eru þagnaðir ...

Þótt ekki sé haft hátt um pólitík þessa dagana er öllum ljóst að það verða sveitarstjórnarkosningar í vor.  Nokkrir valinkunnir pólitíkusar hafa tilkynnt að þeir gefi kosta á sér til að leiða lista síns félags, en enginn hefur lýst vilja sínum til að vera í öðrum sætum. Öðru vísi er farið með fjóra efstu menn Fjarðalistans, sem er vettvangur  félagshyggjufólks í Fjarðabyggð og á núna fjóra menn í bæjarstjórn og mynda meirihluta með framsóknarflokknum. Að sögn Austurgluggans og svæðisútvarpsins sáluga haf þeir allir tilkynnt að þeir gefi ekki kost á sér á framboðslista í vor. Það eru ekki góðar fréttir að allir bæjarfulltrúarnir skuli hætta samtímis. En hvað veldur? Getur verið að vinnuálag á þá sem sinna sveitarstjórnarmálum í minni sveitarfélögum sé svo mikið eða menn svo önnum kafnir við störf sín að ekki gefst tími til að sinna félagsmálum, eða eru þeir illa skipulagðir? Nei málið er að sveitarstjórnarstörf fara engan veginn saman við vinnu almennra launþega, sveitarstjórnarstörfin virðast því aðeins vera fyrir betur setta, ríkt fólk, sem getur haft þessi störf sem hobbý. 

Bæjarfulltrúar á launum 

Það er mikil vinna að vera í sveitarstjórn, það er að segja ef menn sinna störfum sínum af alúð. Það er nefnilega löngu liðin tíð að störf í sveitarstjórnum séu það lítil að það megi sinna þeim með annarri hendi. Það var svoleiðis og þótti nokkur heiður að vera í sveitarstjórn. En það var. Í dag fer ekki saman að sinna þessum störfum og vera í fullri vinnu, reka heimili, sinna börnum og vera með áhugamál. Sólarhringurinn endist ekki fyrir þetta allt og hvað þá allir daga ársins í fjögur ár.Ég hef reynslu af margvíslegum félagsstörfum og tel að störf að sveitarstjórnarmálum í dag eigi að vera launuð. Ég held að það megi hagræða svo í rekstri Fjarðabyggðar svo dæmi sé tekið, að hægt verði að hafa kjörna bæjarfulltrúa á launum. Og ef ekki á fullum launum þá hálfum. 

Fækkum bæjarfulltrúum 

Og af hverju held ég það? Jú ég tel að það megi fækka bæjarfulltrúum úr 9 í 7, helst vildi ég hafa þá 5. Það má stórlega fækka silkihúfunum í embættisstörfum sveitarfélagsins og það á að ráða næsta bæjarstjóra á t.d. sambærilegum launum og alþingismenn hafa. Ekki frían bíl, ekki frítt húsnæði, ekki frían síma og engar aukaþóknanir. Og umfram allt það á að ráða heimamann til starfsins. Mann sem þekkir til svæðisins er i góðum tengslum við íbúana, þekkir sem sagt sína heimabyggð. En miðað við afgreiðslu margra mála tel ég að núverandi bæjarfulltrúar og ráðin bæjarstýra sé úr öllum tengslum við íbúa Fjarðabyggðar. 

Úr tengslum við íbúa sveitarfélagsins 

Það má vel vera að til starfsins fáist enginn  sem mun sætta sig við framantalið enda eru þetta bara hugrenningar íbúa sveitarfélagsins. Íbúa sem hefur áhyggjur af sundrung innan sveitarfélagsins, íbúa sem vill sínu sveitarfélagi alls hins besta, íbúa sem þekkir vel til og veit að þessum hugrenningum deilir hann með fjölmörgum íbúum Fjarðabyggðar. Það hafa verið gerð mörg mistök við stjórnun Fjaraðbyggðar. Mistök sem erfitt verður að leiðrétta og kannski ekki hægt. En það má reyna. Ég óttast ekki að nýtt fólk sem gefur kost á sér í sveitarstjórn muni gera sitt besta en ég harma jafnframt að hluti þess fólks sem hefur verið í forsvari fyrir sveitarfélagið um árabil, gefi ekki kost á sér til starfans. Ég skil vel sjónarmið margra þeirra sem segja að í starfið fari alltof mikill tími, tími sem annars hefði farið í fjölskylduna. En mér finnst líka að þeir sem hafa gefið kost á sér til þessara ábyrgðarstarfa megi ekki gefast upp eftir eitt kjörtímabil eða svo. 

Erum við ekki svaraverð? 

Áslaug Lárusdóttir spyr bæjarfulltrúana í  ágætri grein sem kom í Austurglugganum og Fréttablaðinu nokkurra spurninga. Engin svör hafa fengist frá bæjarfulltrúunum, ekki eitt einasta. Þess vegna spyr ég erum við ekki svaraverð? Hagsmundasamtök Norðfjarðar og Eskifjarðar hafa verið stofnuð og það ekki að ástæðulausu. Samtökin eru stofnuð til að hafa áhrif á bæjarfulltrúana til að koma áfram góðum hugleiknum málum. Því miður hefur ekki verið á þau hlustað. 

Koma og fara  

Brotthvarf Smára Geirssonar úr sveitarstjórnarmálunum er ekki aðeins missir fyrir Fjarðabyggð, heldur allt sveitarstjórnarstigið. Hann hefur verið frumkvöðull nánast allra góðra mála fyrir Austurland og reyndar landsins alls. En er ekki sagt að það komi maður í manns stað? Það er eðli kjörinna fulltrúa að koma og fara. Það er víst en það verður vandfundinn sá maður sem kemur í stað Smára Geirssonar. 

Höfum áhrif 

Leggjum okkar af mörkum til betri byggðar og á þeim málefnum sem varða sveitarfélagið okkar. Við viljum ekki misvitra stjórnendur sem láta allt annað en hagsmuni fólksins í sveitarfélaginu ganga fyrir. Ég skora á allt félagshyggjufólk í Fjarðabyggða að sameinast um að bjóða fram öflugan lista fyrir sveitarstjórnarkosningarnar í vor. Velja til þess duglegt og hæfileikaríkt fólk af báðum kynjum og öllum aldri, það er nóg af því í Fjarðabyggð. Jafnfram vil ég að listinn bjóði fram bæjarstjóraefni og listinn hafi það að markmiði að  bæjarfulltrúarnir hvort sem þeir verða 5 eða 7, verði launaðir. Þó breytingar verði á liði Fjarðalistans og gott fólk hverfi af braut þýðir það ekki að rokkarnir séu þagnaðir.

Athugasemdir

[Ómar Geirsson, 5.2.2010 kl. 14:32]

Blessuð Elma.

Var að lesa þinn góða pistil í Austurglugganum, og vild tjá þér þakklæti mitt með góð skrif. 

Skrif, hvort sem maður er sammála eður ei, eru orðin svo sjaldgæf..  Þess vegna nenni ég ekki lengur að kíkja í Austurgluggann, gott mannamál virðist ekki rata þar inn lengur.

Pistill þinn minnti mig á Kidda Jó, þegar hann var upp á sitt besta, maður las hann alltaf sér til ánægju.  Og vissulega átt þú líka góðar greinar frá þeim dögum sem Austurland var gefið út.

Og svona góðar greinar minna mann alltaf á Bjarna, og hans greinar. 

En ég vildi aðeins segja þér þetta því ég vona að þessi orð hvetji þig til að halda áfram að skrifa um það sem þú gerir best, mannlíf og reisn í sinni víðustu merkingu.

Kveðja úr bænum.

[Hulda Elma Guðmundsdóttir, 5.2.2010 kl. 14:40]

Takk fyrir hrósið Ómar. Þetta er eitt af því sem ég kann best, að skrifa og koma frá mér því sem máli skiptir að mínu mati. Ætli megi ekki segja að ég hafi alist upp við fætur Bjarna, þó langt sé frá að við höfum alltaf verið sammála. Með Kidda Jó var ég tvö kjörtímabil sem aðalfulltrúi en kunningsskapur okkar er langur. Ég vil eindregið hvetja þig til að leggja þitt af mörkum af skrifum sem varða heimastaðinn. Skiptir ekki máli hvar þú ert í pólitík. Bæði viljum við heimabyggðinni sem best. Kveðjur bestar Elma

[Eysteinn Þór Kristinsson, 5.2.2010 kl. 14:59]

Sæl kempa.

Las greinina í Austurglugganum og er þér hjartanlega sammála......... eins og oft áður. Oft ratast kjöf...... satt orð ...............

kveðjur bestar

[Guðmundur Rafnkell Gíslason, 5.2.2010 kl. 15:38]

Góð grein Elma.

Til að fá hæft fólk til að sinna þessu þarf ekki bara að hækka launin. Íbúar þurfa líka að sýna visst umburðarlyndi, jafnvel klappa fólki á bakið þegar vel gengur. Það er sjaldan gert. Hins vegar stendur ekki á svívirðingum, persónulegum níð og fleiru þegar sérfræðingar út í bæ taka sig til, sérstaklega á blogginu og nafnlausum athugasemdum þar. Það eru ekki allir með skráp í þetta. Góð dæmi um þetta má sjá inn á austurglugginn.is. Þar eru stuttar fréttir um hverjir ætla að gefa kost á sér. Svo koma nafnlaus komment við þessi fréttaskot sem eru bara illkvittni. Hugsið ykkur hvernig fólki líður sem er að gefa kost á sér í samfélagsvinnu og þetta byrjar svona.

Annars kveð ég sáttur í vor með vissu í hjarta að ég hef gert meira gagn en ógagn þau 15 ár sem ég hef verið aðalbæjarfulltrúi.

Vonandi þora einhverjir með hjartað á réttum stað í þennan "slag".

[Hulda Elma Guðmundsdóttir, 5.2.2010 kl. 17:19]

Takk vinur. Alveg fram að þessu hef ég verið að gæla við þá hugmynd að þú skiptir um skoðun, sem sagt leiddir listann í næstu kosningum. Þakka þér fyrir þitt framlag sem ég met mikils. Það er rétt það þarf góðan skráp í þetta en það ættu menn að hafa gert sér ljóst fyrir fram.