Að loknu Neistaflugi

Neistafluginu lauk með mikilli flugeldasýningu í gærkveldi. Ekki var skotið upp á sama stað og áður, þ.e. á höfninni, þannig að allir skrautflugeldarnir sprungu við eða yfir sjúkrahúsinu. Það hefur ekki verið gott að vera sjúklingur þar á þeim tíma! Annars fór þetta allt vel fram. Af þeim tveimur fíkniefnamálum sem upp komu var annar aðilinn þekktur hér áður fyrr sem “díler” og neytandi. Á Akureyri urðu fíkniefnamálin á sjöunda tuginn, enda “Ein með öllu”.

Við hér á Mýrargötunni höfum haft það gott. Jóhann Nökkvi og María Mist hafa verið ósköp góð, að undanskildu því að MM fékk smá leiðindakast í gærkveldi, en það hvarf með svefninum. "Litla fjölskyldan" sem stækkar reglulega kom í gær og var ánægð að sjá tertuna í ísskápnum, var henni gerð góð skil og kláraðist í gærkveldi! Lofaði MM að baka með henni í dag og stend við það, auðvitað.

Ekki get ég frekar en fyrri daginn hrósað spilamennsku minni í Neistaflugsgolfinu. Seinni hringurinn var í lagi en sá fyrri ömurlegur. Það er verst að ég veit hvað er að en ég hef ekki til þessa getað breytt því. Það kemur. Framundan eru Hefðameyjamótið og Stefánsmótið, til heiðurs Stebba Þorleifs níræðum. Lifið heil.