Úr handraðanum

Ég gekk í Barnastúkuna Vorperlu nr.64 á Norðfirði 27. október 1951. Þessu til staðfestingar á ég flott skírteini þar sem fram kemur stofndagur Barnastúku Íslands sem hafði að leiðarljósi, trú, von og kærleika. Stúkan sú var stofnuð 24. júní 1886. Ég get ekki sagt að ég hafi verið góður stúkufélagi. Tók þátt í laumureykingum í kofanum hennar ömmu. Reykti mér til óbóta ásamt vinkonunum í skjóli undir bát í fjörunni. Svo veik varð ég af þeim reykingum að ég rétt komst heim og þá kom sér vel að hafa baðkerið við hliðina á klósetinu!

Ég á líka byssuleyfi sem gefið var út 22. maí 1959. Ég fékk sem sagt byssuleyfi 16 ára. Í því stendur að ég hafi leyfi til að eiga og nota riffil. Undir þetta skrifar Axel Thulinius. Ég man vel tildrögin að umsókninni um byssuleyfi. Pabbi vinkonu minnar sagði að konur gætu ekki fengið byssuleyfi og ég fór á skrifstofu bæjarfógeta til að afsanna það. Ég vissi nefnilega um eina konu sem hafði slíkt leyfi. Þegar ég var spurð; er það fyrir haglabyssu eða riffil, svaraði ég riffill. Byssuleyfi nr. 339, takk fyrir. Já, það kostaði 250 krónur.

Athugasemdir

[Petrún Bj. Jónsdóttir (IP-tala skráð) 24.8.2006 kl. 13:56]

Ertu að taka til í gömlu dóti;-)

[elma (IP-tala skráð) 24.8.2006 kl. 14:35]

Vissi alltaf af þessum skírteinum, en þau komu í ljós í gær. Já, er að tæma skápa og er alltaf með hálf fulla ruslapoka.