Íþróttamaður ársins

Blaksamband Íslands hefur valið Norðfirðinginn Miglenu Apostolovu sem blakkonu ársins og er það vel. Hún er ekki fyrsta norðfirska blakkonan sem hlýtur hefur þessa viðurkenningu og sýnir þetta betur en allt annað frábæra stöðu okkar Þróttara í þessari íþróttagrein. Önnur sérsambönd eru þessa dagana að velja sína fulltrúa en Íþrótta- og Olympíusamband Íslands veldur ekki íþróttamanna ársins, sem það ætti í sjálfu sér að gera. Það eru samtök íþróttafréttamanna sem velja íþróttamann ársins, ekki mjög fjölmennur hópur,  sem horfir meira á knattspyrnu en aðrar íþróttir

Í Mbl. bloggi í dag er fjallað aðeins um þetta val og þar kemur fram að að formaður samtaka íþróttafréttamanna og Heimir Karlsson telja að kjör íþróttamanns ársins verði mjög vandasamt, þar sem enginn íþróttamaður hafi virkilega skarað fram úr í ár. Að sjálfsögðu er þetta vegna þess enginn fótbolta- eða handboltastrákur hefur skarað fam úr.

Ég hef iðulega gagnrýnt valið á íþróttamanni ársins. Finnst íþróttamönnum gert mishátt undir höfði af hálfu íþróttafréttamanna. Ekki er tekið tillit til hvort viðkomandi er í einstaklingskeppni eða hópíþrótt en hópíþróttirnar hafa vinninginn. Frá því að þessi verðlaun voru fyrst veitt Vilhjálmi Einarssyni 1956 og þar til nú hafa aðeins þrjár konur fengið þessa viðurkenningu, Sigríður Sigurðardóttir fyrir handknattleik, Ragnheiður Runólfsdóttir fyrir sund og Vala Flosadóttir fyrir frjálsar íþróttir. Ég tel að nú sé komið að því fyrst á annað borð er verið að velja úr flokkaíþróttum að Margrét Lára Viðarsdóttir sé vel að þessum titli komin. Vonandi hafa íþróttafréttamennirnir sem að þessu vali standa tekið eftir árangri hennar með sínu félagsliði og íslenska landsliðinu í sumar. Nema þeir séu enn með kíkirinn fyrir blinda auganu. Nú Ásthildur Helgadóttir sem spilaði í Svíþjóð var máttarstólpi eins besta liðsins í sterkustu deildarkeppni kvenna í heiminum, þar sem hún var iðulega borin saman við Mörtu frá Brasilíu sem í vikunni var kjörin knattspyrnukona ársins 2007 af fyrirliðum og þjálfurum kvennalandsliða. Bæði Margrét Lára og Ásthildur hafa skarað fram úr í íþrótt sinni á árinu og hafa náð lengra en nokkur karlkyns „boltastrákur" hefur náð, hugsanlega að Eiði Smára undanskyldum þegar Chelsea lék til undanúrslita í Meistaradeild Evrópu um árið.

Þá má ekki gleyma Rögnu Ingólfsdóttur var rétt í þessu að tryggja sér sæti í undanúrslitum alþjóðlega badmintonmótsins Hellas Victor International og er sennilega að tryggja sér keppnisrétt á Olympíuleikunum í Kína á næsta ári.

Athugasemdir

[Jóna Harpa (IP-tala skráð) 20.12.2007 kl. 14:19]

Hæ,hæ
Ég veit að Miglena er vel að þessum titli komin!! Segðu mér veistu hvernig valið fer fram...............eiga t.d. þeir sem spila erlends ekki möguleika á þessu vali? Nú er ég bara að forvitnast
Annars er allt gott að frétta hér í Dk. svei mér þá ef jólaskapið er bara ekki alveg að koma

Knús héðan til þín

[Hulda Elma Guðmundsdóttir, 20.12.2007 kl. 14:30]

Þeir hand- og fótboltamenn sem hafa verið valdir hafa allir leikið með erlendum liðum, þannig að þú og Elsa eruð gjaldgengar! Var að fá jólasíldina frá tengdapabba þínum og fer með hana suður á morgun. Ég fékk smá jólafíling um helgina en hann hvarf á mánudaginn. Ætla að senda þér smá póst í kvöld. Kveðja til allra og jólaóskir, Elma

[Hulda Elma Guðmundsdóttir, 20.12.2007 kl. 14:32]

Já, gleymdi, valið fer þannig fram að íþróttafréttamennirnir gefa stig frá 1 - 10Sá stigahæsti verður svo fyrir valinu. Mér er sagt af kunnugum að þarna sé yfirleitt heljarins plott í gangi. Eg.

[Jóna Harpa (IP-tala skráð) 20.12.2007 kl. 21:00]

Takk fyrir póstinn!!  Góður!!!
Ég ætla rétt að vona að þú hafir ekki verið að meina að ég héldi að ég ætti einhvern séns í þennan titil!!! Guð minn góður nei.
Ég var nú með mág minn í huga, hann er búin að standa sig rosalega vel og hans lið er efst hér í Dk. og eru komnir í úrslit í bikarnum. Þess vegna var ég að velta þessu fyrir mér.
Hej igen

[Hulda Elma Guðmundsdóttir, 20.12.2007 kl. 22:46]

Nei ég var ekki að vona neitt svoleiðis. En varðandi hann frænda minn þá get ég sagt þér að íþróttafréttamenn hafa ekki nokkurn áhuga á blaki og hvað þá í öðrum löndum. Það væri flott ef við, almenningur, fengjum að kjósa en ekki fámenn klíka fótboltaáhugamanna.

[Edda Agnarsdóttir, 1.1.2008 kl. 10:12]

Mikið er ég sammála þér í þessum pistli þínum.

Góður pistill - takk fyrir.