Á Þorláksmessu

Þá er komin Þorláksmessa. Hjá Jóhanni og Camillu var skata í hádeginu og nokkrir matargestir í heimsókn. Ég fékk mér síld frá Halla frænda, frábær matur sem allir dásama sem smakka. Mér finnst skata ógeðslegur matur en virði það að þetta er það sem fólk vill á Þorláksmessu, en raunar finnst mér þetta vera orðið svolítil tíska. Fyrir sumum er skata á Þorlák eins og rjúpan fyrir mér á aðfangadag.Það er leiðindaveður og hefur verið frá því ég kom, auð jörð og verður samkvæmt spám fram yfir áramót. Við verðum auðvitað með rjúpur á morgun, jólamatur frá því að ég man eftir mér, með einni undantekningu þó, því ein jól í kringum 1960, voru mamma og pabbi með hamborgarahrygg í fyrsta skipti, því engar rjúpur fengust. Laugi frændi í Seldal sem alltaf hafði séð okkur fyrir rjúpum í jólamatinn fékk ekki nema handa heimilisfólkinu í Seldal. Þetta var tilbreyting aðsmakka hamborgarahrygg og það í fyrsta skiptið og það var ekki fyrr en ég varð eldri, fullorðnari, að ég kunni að meta hefðina.Það voru einu sinni umm páska að það voru til nokkrar rjúpur í frystikistunni hjá Petru. Ég eldaði þær og þegar lyktin fyllti húsið fannst mér ég vera að framja helgispjöll! Því það er pottþétt að þegar lyktin af rjúpunum fyllir húsið á aðfangadag segir heimilisfólkið; nú eru komin jól.

Athugasemdir

[Haraldur Bjarnason, 23.12.2008 kl. 22:30]

Sinn er hver siðurinn Elma. Fyrir mig er skatan nauðsynleg á Þorláksmessu. Raunar var skata hversdagsmatur heima hjá mér í æsku og mér hefur allt frá barnæsku þótt hún góð. Hins vegar hef ég aldrei vanist að borða þessa fugla af dúfnakyni; rjúpurnar. Einu sinni smakkaði ég þær en fannst vondar. Hangikjet, helst heimareykt og hamborgarhryggur er minn matur á jólunum. Jólakveðjur til þín og þinna.

[Hulda Elma Guðmundsdóttir, 24.12.2008 kl. 10:42]

Gleðileg jól Halli minn og takk fyrir liðnar stundir.