Ég fer á þing

Ég hef ákveðið að gefa kost á mér til setu á Alþingi Íslendinga. Ég tók þessa ákvörðun í nótt að vandlega athuguðu máli. Ég hef aldrei farið í launkofa með pólitískar skoðanir mínar þær snúast um bræðralag og jafnrétti. En ég tók þessa ákvörðun í þeirri vissu að ég á fullt erindi á þing. Er skelegg og málefnaleg og mun beita kröftum mínum sérstaklega í þágu landsbyggðarinnar, einkum Austurlands. Ég hélt minn fyrsta framboðsfund í nótt og var hann vel sóttur og ég ákaft hvött áfram. Fjölmargir lofuðu mér stuðningi og peningum til að fjármagna framboðið. Ég man ekki hver var fundarstjóri en ég flutti magnað lokaávarp sem hver fullgildur stjórnmálamaður hefði verið fullsæmdur af. Ég er þegar byrjuð að skrifa “jómfrúarræðu” mína á þinginu.

Þegar hamarinn féll í fundarlok. Hrökk ég upp. Þetta var þá bara draumur eða kannski bara martröð. Allavega var mér létt þegar ég loksins gat opnað augun og gert mér ljóst að ég var ekki að fara á þing, heldur í framboð í Félagi eldri borgara á Norðfirði.

Athugasemdir

[Hólmfríður Bjarnadóttir, 19.2.2009 kl. 14:33]

Þú ert kannski búinn að ganga með þingmanninn í maganum í mörg ár og þarna var hann að fá sína útrás, í draumi. Gangi þér vel í framboði í félagi eldri borgara.

[Hulda Elma Guðmundsdóttir, 19.2.2009 kl. 14:58]

Nei Hólmfríður, ég hef aldrei gengið með þingmann í magnaum. Bæði samt stelpu og strák og hvorugt þeirra er þingmaður! Tók að vísu einu sinni þátt í skoðanakönnun, það var fyrir tíma prófkjörana og lenti í efsta sæti. Hef meiri áhuga á að starfa í grasrótinni en í framvarðasveitinni.

[Hólmfríður Bjarnadóttir, 19.2.2009 kl. 15:05]

Þetta var nú bara smá djók og ekki illa meint nema síður væri.

Nýtt lýðveldi  - skrifa undir áskorun  HÉR