Og svo legg ég til...

Ríkisstjórn Jóhönnu Sigurðardóttir er að leggja drög að stórsigri hægri aflanna í sveitarstjórnarkosningunum í vor og í framhaldi af því að þurrka út Samfylkinguna og Vinstri græna í næstu Alþingiskosningum.

Hvað í andsk... er þetta fólk að vilja í ríkisstjórn? Eru ráðherrastólarnir svo þægilegir að allt sé lagt í sölurnar til að geta sest í þá? Ég hef svo sem horft á íhaldið og framsókn leika þennan leik, en ég hélt að eitthvað betra tæki við þegar vinstri öflin tækju völdin. Dj... ertu vitlaus Elma, sagði ég við sjálfa mig.

Núverandi ríkisstjórn hefur brugðist fólkinu í landinu, hinum almenna borgara, elli- örorku- og lífeyrisþegum á nákvæmlega sama hátt og íhaldið og framsókn gerðu. Munurinn er sá að þeir síðarnefndu lofuðu ekki bót og betrun, þeir höfðu því ekkert að svíkja.. Ríkisstjórn Jóhönnu kroppar í hvers manns ranni svo framarlega sem sá hinni sami er almúgamaður. Sem fyrr er stóreignafólkið látið í friði, klórað í bakkann með smá skattahækkun á þá sem mest hafa. Nefnd eftir nefnd er sett á laggirnar til að skoða hver var valdur af hruninu, það gleymist að líta í eigin barm og launin sem nefndarmenn fá eru ekki skorin við nögl. Ég vil að þessi ríkisstjórn segi af sér og láti íhaldið og framsókn þrífa upp skítinn eftir sig,

Minn tími mun koma hrópaði Jóhanna, en tók ekki fram hver yrðu verkin hennar. Þau hafa ekki verið í þágu þeirra sem kusu hana það er næsta víst. Ég nenni ekki að eyða orðum á fjármálaráðherrann, hann hefur margoft  sýnt sinn innri mann. Honum leiðist ekki að tala og endurtekur sig æ ofan í æ.