Stöðvið fjöldamorðin - slítum stjórnmálasambandi við Ísrael

Ef íslensk stjórnvöld hafa einhvern dug í sér ættu þau að slíta stjórnmálasambandi við Ísrael og það hefði auðvitað átt að hafa verið gert fyrir löngu. En á meðan íhaldið og framsókn sleiktu skó bandaríska auðvaldsins, sem dælir peningum til Ísraels gerðist ekkert, en nú er lag. Ingibjörg ég treysti að þú hreyfir málinu. Slíttu stjórnarsamstarfinu ef íhaldið ætlar að hanga áfram í pilsfaldi kanans.

Mótmæla blóðsúthellingum

Rauðar nærbuxur um áramótin

Eftir lestur Fréttablaðsins í morgun ákvað ég að vera í rauðum nærbuxum um áramótin. Í Mexíkó trúa konur því nefnilega að ástarlíf þeirra verði betra á nýju ári, allt rauðum nærbuxum að þakka. Og því skyldi það ekki gilda um okkur hér á klakanum líka?  Konur eru jú allsstaðar konur. Já það þarf ekki mikið til. En þannig er það nú, að ég á engar rauðar nærbuxur, ég á þær hvítar, gular og bleikar, en engar rauðar, en rauðar verða þær víst að vera og því skulu keyptar rauðar nærbuxur, strax í dag!        Dj… hlakka ég til!

Litla Hraun og jólin

Helgi Seljan er uppáhalds fréttamaðurinn minn. Hann fékk það verkefni fyrir jólin að fara á Litla Hraun og fylgjast með undirbúningi fanganna fyrir jólin. Í góðum pistli í Fréttabalðinu í dag er fjallað um þessa heimsókn og þar segir meðal annars: “Í bráðskemmtilegri samantekt komst ég að því að á Litla-Hrauni sérpanta fangarnir mat. Ekki þarf að koma nokkrum manni á óvart að þeir panta reykt svínakjöt, hangikjöt auðvitað og blandað sjávarfang og ónefndur fangi hefur getið sér gott orð fyrir súkkulaðibitakökurnar sínar. Andrúmsloftið í fangelsinu er sérstakt yfir hátíðarnar, og eins og gefur að skilja er það blendið. Margir fangar eiga um sárt að binda. En svo er reyndar um fleiri. Hvað um konurnar sem hefur verið nauðgað? Hvað um svívirtu börnin og þeirra fólk? Hvað um foreldra þeirra myrtu? Ætli þessi hópur hafi átt gleðileg jól? Leturbreytingin mín.

Ár frá morðinu á Benazir Bhutto

   Í dag er ár liðið síðan Benazir Bhutto var myrt, en hún lét lífið í tilræði á kosningafundi. Það er svo að ákveðin atvik sitja lengur í huga mér en önnur og ég man fréttina af morðinu á Bhutto eins og það hafi gerst í gær, enda bara ár liðið. E n þetta á líka við um morðið á Kennedy þó 40 ár séu liðin frá morðinu á honum. Ég veit að mörgum er eins farið og mér, geta nefnt stað og stund þegar ákveðnir atburðir hafa gerst.  

Benazir Bhutto gegndi í tvígang forsætisráðherraembætti í Pakistan, fyrst frá 1988 til 1990, og síðan frá 1993 til 1996. Í báðum tilfellum var hún hrakin frá völdum af forseta landsins vegna ásakana um spillingu sem aldrei sönnuðust. Ferill Benazir Bhutto einkenndist af sviptingum. Þegar hún naut mestra vinsælda - stuttu eftir að hún var fyrst kosin í embættið - var hún einn þekktasti kvenleiðtogi heimsins.Hún var ung og glæsileg þegar hún komst til valda og tókst að draga upp ferska mynd af sjálfri sér sem andsvar við karlstýrðu samfélaginu sem hún bjó í.  

Benazir Bhutto var heiðruð í heimalandi sínu og erlendis sem tákn nútímaviðhorfa og lýðræðis. Hún barist gegn ásökunum um spillingu. Þær voru ástæða þess að hún fór í sjálfskapaða útlegð sem hún sneri aftur úr eftir átta ár í október. Hún lét lífið í árás eftir kosningafund í bænum Rawalpindi.

Gleðileg jól

Gleðileg jól kæru vinir, gott og farsælt komandi ár. Þakka ný- og lönguliðnar stundir. Hlakka til endurfunda á nýju ári.

Þið kæru bloggvinir, takk fyrir ánægjuleg samskipti.

Jólakveðjur Elma

 

Á Þorláksmessu

Þá er komin Þorláksmessa. Hjá Jóhanni og Camillu var skata í hádeginu og nokkrir matargestir í heimsókn. Ég fékk mér síld frá Halla frænda, frábær matur sem allir dásama sem smakka. Mér finnst skata ógeðslegur matur en virði það að þetta er það sem fólk vill á Þorláksmessu, en raunar finnst mér þetta vera orðið svolítil tíska. Fyrir sumum er skata á Þorlák eins og rjúpan fyrir mér á aðfangadag.Það er leiðindaveður og hefur verið frá því ég kom, auð jörð og verður samkvæmt spám fram yfir áramót. Við verðum auðvitað með rjúpur á morgun, jólamatur frá því að ég man eftir mér, með einni undantekningu þó, því ein jól í kringum 1960, voru mamma og pabbi með hamborgarahrygg í fyrsta skipti, því engar rjúpur fengust. Laugi frændi í Seldal sem alltaf hafði séð okkur fyrir rjúpum í jólamatinn fékk ekki nema handa heimilisfólkinu í Seldal. Þetta var tilbreyting aðsmakka hamborgarahrygg og það í fyrsta skiptið og það var ekki fyrr en ég varð eldri, fullorðnari, að ég kunni að meta hefðina.Það voru einu sinni umm páska að það voru til nokkrar rjúpur í frystikistunni hjá Petru. Ég eldaði þær og þegar lyktin fyllti húsið fannst mér ég vera að framja helgispjöll! Því það er pottþétt að þegar lyktin af rjúpunum fyllir húsið á aðfangadag segir heimilisfólkið; nú eru komin jól.

Tertuspaði

Ég fékk tertuspaða í jólagjöf frá sparisjóðnum mínum. Ég átti nokkra fyrir. Auðvitað er merki sparisjóðsins á honum þannig að ég er ekki viss um að ég muni hafa hann í þeim tertum sem ég á eftir að bera fram.

Ég held að gefendum gangi allt gott til, þarna eru þeir að ná sér í ódýra auglýsingu og láta um leið líta svo út sem viðskiptavinirnir séu þeim einkar hjartafógnir. Sparisjóðirnir eru ekki einir um þetta. Ég fékk í vikunni rafhlöðu frá TM, á núna þrjár svoleiðis en engan reykskynjara í lagi. Í fyrra gaf Fjarðabyggð öllum starfsmönnum sínum handklæði, merki sveitarfélagsins saumað í þau, flott gjöf, góð auglýsing. Þetta gerði Síldarvinnslan líka fyrir nokkrum árum og SVN handklæði lágu út um allt. Voru skilin eftir í sundlauginni, í íþróttahúsinu og á íþróttavöllunum, meira að segja sá ég eitt í íþróttahúsi á Möltu.

Hættið þessari auglýsingamennsku, notið peningana til einhvers annars, allavega ekki í tilgangslausar jólagjafir, sem í raun fáir eða enginn kærir sig um.

 

Vísið þeim strax úr landi

Í dag voru 4 Pólverjar dæmdir til fangelsisvistar vegna Keilufellsmálsins svonefnda. Þeir hlutu samtals dóm upp á fangelsisvist í tæplega 4500 daga. Það kom fram í fréttum í kvöld að það kostar 24.000 á dag að vista hvern fanga. Reiknið þið nú!

Af hverju eru þessir menn ekki sendir úr landi og það ekki seinna en strax? Er þetta ekki ein besta leiðin til að spara, það á hvort sem er loka fangelsunum eitthvað tímabundið. Ég segi nú eins og Halli Bjarna; ég hélt að þau væru alltaf lokuð.

Sendið alla erlenda ríkisborgara sem í íslenskum fangelsunum eru úr landi, hættið að fóðra þá, því eitt er víst ekki betrumbæta yfirvöld þá!

Skýrir póstinn frá Bjarna og Þorleifi

Þá er komin skýringin á "ómeðvituðum" póstsendingum frá Bjarna Harðar framsóknarmanni og Þorleifi fulltrúa vinstri grænna í borgarstjórn. Mennirnir hafa vitanlega sent þessa pósta steinsofandi. Þeim verður varla refsað fyrir það. Er þetta ekki svipað og ganga í svefni, fremja rán eða eitthvað þaðan af verra, engin refsins önnur en að vera meðvitundarlaus!

Sofandi kona sendi tölvupóst

Styð þjóðaratkvæðagreiðslu

Ég er og hef verið á móti aðild að Evrópusambandinu. Ég þykist líka vita að skoðanir landsmanna séu skiptar og því tel ég að aðeins þjóðaratkvæðagreiðsla skeri úr um vilja landsmanna.
Ég er líka sannfærð um að aðild verði hafnað komi til þjóðaratkvæðagreiðslu. Ég held að alltof miklu verði fórnað til aðkomast inn í þetta batterí sem Evrópusambandið er og ef menn halda að aðild að Evrópusambandinu muni bæta fyrir það tjón sem við núna stöndum frammi fyrir, vaða þeir í villu og svima.
Fólk verður að skilja á milli þess ástands sem nú ríkir á landinu og aðildarviðræðum.

Þjóðaratkvæðagreiðsla um aðildarumsókn