Gefum tjöllunum langt nef

Vona svo sannarlega að Ingibjörg Sólrún meini eitthvað með þessari sparnaðarnefnd. Hennar fyrsta verk verður væntanlega að afþakka loftrýmiseftirlit tjallana. Sýna þeim hvar Davíð - ekki Oddsson - keypti ölið, að þeir fái ekki að komast upp með svona yfirgang eins og þeir hafa sýnt okkur að undanförnu. Gerum eins og í landhelgisstríðinu; slítum stjórnmálasambandi við þá.

Horfið frá beiðni um loftrýmiseftirlit?

Íhaldið og framsókn í allri sinni mynd

Öll munum við hvað gerðist þegar síminn var einkavæddur. Það er ekki þörf á að rifja það upp hér, nóg er nú samt. En þetta er enn eitt dæmið um vafasamar gjörðir Sjálfsæðisflokks og Framsóknarflokks þegar þeir kúrðu saman í ríkisstjórn og gældu hvor við annan. Ég ætla til annars símafyrtækis, það bjóða margir betur en Síminn.

Síminn hægir á niðurhali stórnotenda

Hafa alltaf staðið með okkur

Færeyska landsstjórnin hefur ákveðið að veita Íslandi 300 milljóna danskra króna gjaldeyrislán, jafnvirði rúmlega 6,1 milljarðs íslenskra króna. Þessi litla frændþjóð okkar í austri hefur alltaf staðið með okkur og sýnt það áþreifanlega í verki. Takk fyrir vinir mínir í Færeyjum.

Færeyingar vilja lána Íslandi

Ætlið þið að samþykkja þetta?

Mogginn hefur heimildir fyrir því að peningamarkassjóðum Landsbankans verði slitið í dag. Líka að áformað sé að greiða 60 - 74% af innistæðunum. Ætla þeir sem eiga peninga í peningamarkassjóðunum að samþykkja þetta? Þjóðin reis upp þegar olíufurstar landsins stálu milljónatungum af landsmönnum. Þetta er verra, hérna er um milljarða að ræða. Hvaða lögfræðingur vill taka að sér að reka mál sparifjáreigenda?

Landsbankinn greiðir upp peningamarkaðssjóðina

Fyrirsjáanlegt?

Ef þetta nýja nafn á Landsbankann var skráð 2003 er þá ekki augljóst hvað hefur vakað fyrir eigendunum? Keyra bankann í þrot og senda svo skítseiðin til að kaupa á brunaútsölu!

Landsbankinn verður NBI hf.

Kallað eftir aurum

Viðskiptaráðherra hefur kallað eftir aurum. Hann hefur látið þá skoðun sína í ljós að íslenskir auðmenn sem eiga peninga sína erlendis færi þá heim. Öll spjót hafa beinst að Björgólfsfeðgum, það er eins og engir aðrir en þeir eigi peninga í erlendum bönkum, þá helst á þeim svæðum þar sem þeir eru ekki gefnir upp til skatts. Á eyjum í Karabíska hafinu, Sviss og fleiri skattaparadísum.

*

En eru það ekki fleiri Íslendingar  en þeir fyrstnefndu sem eiga peninga í erlendum skattaparadísum. Hvað með Björk sem var að því er virðist fyrst Íslendinga til að notfæra sér skattaparadísina í Karabíska hafinu?

*

Halda menn virkilega að Björgúlfur Guðmundsson sé eignalaus maður þó hann láti sem svo við Agnesi Bragadóttur blaðamann. Sem er að mínu viti einkar lagin að hagræða sannleikanum og sleikja rassgatið á þeim sem kunna að gera vel við hana. Björgólfur Guðmundsson var dæmdur fyrir þjófnað, eins og það heitir á kjarnyrtri íslensku. Segir ekki máltækið; einu sinni þjófur, alltaf þjófur?

*

Ég veit það ekki en allavega hefur hann gert þúsundir Íslendinga fátækari.

Aðgerðir

Ég skil ekki hvað þetta fólk á við þegar það segir: „Rjúfum þögn ráðamanna og göngum til lýðræðis.“ Mér finnst ekkert hafa vantað á innhaldslausar yfirlýsingar þeirra. Yfirskriftin hefði átt að vera " Við viljum aðgerðir"

Þögn ráðamanna mótmælt

Hvað með peningabréfin í LÍ?

Dag eftir dag hef ég fengið tölvupóst frá einkabankaþjónustu Landsbanka íslands þar sem segir að á morgun verði ákveðið hvernig staðið verði að greiðslum af Peningabréfsreikningunum - þeim íslensku. Dag eftir dag hafa þetta verið orðin tóm. Hvað er að gerast? Erum við íslenskir sparifjáreigendur að greiða Icesave-reikninga Lansdsbankans í Bretlandi?

Eitt er víst, að hvernig sem allt fer mun ég aldrei framar eiga viðskipti við Landsbanka Íslands! 

Eigendur Icesave-reikninga fá greitt innan tíu daga

Þegar ég sá hann

Það var Tyrkneskt kvöld. Matur að hætti innfæddra sem og hljóðfæraleikur og dans – magadans. Mér finnst tónlistin þeirra lítið spennandi, alltof hávær og strengjaískur. Að borðhaldinu loknu tók við vestræn tónlist, rómantísk lög meðal annars með Eagles og fleiri góðum hljómsveitum.

*

Þá tók ég eftir honum, hann horfði á mig eins og ég væri ein í heiminum, svei mér þá ef ég roðnaði ekki. Reyndi að láta sem ekkert væri en verð að viðurkenna að hjartað var á fullu. Þegar ég leit næst á hann gekk hann til mín og bauð mér upp í dans. Ég var eins og í spennutreyju í örmum hans og mér var stýrt af öryggi í dansinum. Hann var hærri en ég, vitanlega svarthærður með svört leiftrandi augu með óræðu bliki í, tennurnar eins og perlur og varirnar fagrar og kyssilegar. Hann angaði af austrænum höfgum ilmi, einhvers konar muskilmi, sem fékk mig til að skjálfa.

*

Hver dansinn tók við af öðrum. Það var heitt inni svo við gengum út. Hvorugt okkar hafði sagt orð. Úti voru borð, stólar og bekkir og við settumst á einn þeirra. Ég var hrædd um að hann heyrði hjartsláttinn í mér. Hann sneri sér að mér, tók báðum höndum um vanga mína og strauk létt yfir varir mínar og hálfopnaði þær. Ég var týnd í heimi óþekktra ástríðna. Um leið og varir okkar mættust leit ég í svört augu hans og mundi um leið hvaða lag Eagles hafði verið að spila; Lyin’ Eyes.

*

Þá hringdi helvítis vekjaraklukkan.

Bloggleti

Ég er að farast úr bloggleti, eða bara leti almennt. Fór að asnast á andlistbókina og finn að hún tekur alltof langan tíma. Það var samt gaman að koma þar við og “hitta” fjöldann allan af kunningjum, ættingjum og vinum. En ég held að ég haldi mig við bloggið – þegar ég nenni.